Алла берген қабілеттерін ақиқи иманмен астастырған ақындардың Алланың атымен басталған жақұт жырлары қай заманның көшінде де жылаған елге жұбаныш, қайғырған елге қайрат берген. Сөз қадірін өз қадірім деп білетін, бетінде ұяты, аузында батасы, жүрегінде иманы жүретін абзал жандарды ел құрметтейтін, айтқандарын амалға асыратын. Бұл да – Алланың нығметі емес пе? Олай болса, бүгін назарларыңызға ұсынылатын жүрек жарды жырларымен шынайы насихат айтуға асыққан ақындарымызды тыңдап көрейікші..

Жалғыз Алла жаратқан бұл ғаламды
(М. Әлібекұлы)

Жалғыз Алла жаратқан бұл ғаламды
Ақын, батыр, кемеңгер тұлғаларды.
Тірлігіңде Аллаға құлшылық қыл,
Бес күн жалған, тастарсың бұл базарды.

Жын нәпсінің бұзамыз торын қалай?
Жәннат бақтың табамыз жолын қалай?
Жаратқанның құрметін ала алмаймыз
Пайғамбардың сүннетін орындамай.

Еp болсаң да жеңілмес ешбір жаудан,
Өтер-кетер басыңнан бес күн жалған.
Бәріміз де бақиға сапарласпыз,
Шығып кете алмайды ешкім жолдан.

Өлімді ойлап, жүректі жібітіңдер,
Жын-сайтанның жігерін үгітіңдер.
Я, Жасаған! Раббысы әлемдердің,
Шын мұсылман адамның үмітін бер!

Құлшылық қыл,
Сынақ үшін берілген тіршілік бұл!

Шын шебер
(Б. Имаш)

Бисмиллаһ (пенен) болған іс берекелі һәм байыпты,
Аллаға ғибадат етпеген пендесі болмақ айыпты…
Шүкірлік пенен құлшылық, мадақтау менен ұлықтау,
Раббысы барша әлемнің, Аллаға ғана лайықты!

Құдіретін танып ой жетпес, батысқа қара шығыспен,
Миллиардтаған ғаламшар жаңылмас бір сәт жүрістен.
Шаршаусыз, Мұңсыз, Міні жоқ, Әуелден болған Соңы жоқ,
Құдіреті күшті Жәрдемші, бәрінен Ұлы, тым Үстем.

Серігі жоқ ешқандай, ұқсайтын, тіпті, теңі жоқ,
Жаратқанының беймәлім артығы және кемі жоқ.
Ризық беруші, ең Жомарт, Қамқорлығы да өлшеусіз,
Сүйген құлына төгетін Мейірімінің де шегі жоқ!

Белгілерін көре біл, бақылап барлық тараптан,
Ұлттарға бөліп ұлысқа, ғаламға бізді таратқан.
Қиямет күннің Қожасы, Есеп күнінің Егесі,
Адам мен жынды тек қана, құлшылық үшін жаратқан!

Бос қайтаруға ұялған қолдарды көкке жайылған,
Жалғыз-ақ ізгі ісіңді, сансыз еселеп қайырған.
Сұрағаныңды Беруші, Иесі барша Мүліктің,
Тәубені қабыл етуші, Кешірімді де Мейірбан.

Сауабы менен күнәсін қиянат қылмай өлшетіп,
Кітап түсіріп, нұсқаған тұп-тура жолды көрсетіп.
Сүйіншілеген сыйымен, азабы барын ескерткен,
Пенделерінің ішінен, ең абзалдарын елші етіп.

Ақ буды көкке көтеріп, төбеңнен жауын нұр себер,
Жаратқан Хақтың алауы шуақты күнің күлсе егер.
«Бол» деген жалғыз қалауы, әлемді жоқтан бар еткен,
Көктер мен жердің Раббысы, Аллаға сыйын шын Шебер!


Тірілтсем тілімдегі кәлимамды
(М. Нияз)

Тірілтсем тілімдегі кәлимамды,
Алтыннан артық көрем ар-иманды.
Бақ пен сорға барымта болып кеткен,
Басымызда тұрмайды фәни мәңгі.

Сөндіріп айырады сәулеңнен кім?
Ол мына бес-ақ күндік дәурендер мін.
Тәубесіне түсудің орнына
Әуресіне түсеміз әудем жердің.

Талайды адастырған арман-елес,
Шындықты айтып жатса да зарлап өңеш.
Қыл көпірге дайындал, ол жер саған,
Жалпағынан басатын жалған емес.

Соқтығып соқа басың жарға күнде
Ақиқат ауылын тапсаң арманың не?
Әзірейіл келгенше әзірлік қыл
Табыт мініп баратын тар қабірге.

Тоқтаса тірлік бір күн толастайсың,
Жазымыштан мен аспаймын, сен аспайсың.
Алланың бізге берген нығметін
Көргенде басың шайқап, жақ ұстайсың.

Ғайбаттаудың күнәсін білген кезде
Жан адамның сыртынан жақ ашпайсың.
Дүниенің опасызын сезінгенде
Ешкімменен тартысып, таласпайсың.

Бес уақытқа бүгіліп, сәжде қылсаң,
Ешуақытта сүрініп, адаспайсың.

Жақсылық тілесеңіз өзіңізге,
Иманнан суалмайтын сезім ізде.
Жаратқан тек Жәннатты көрсетсе екен.
Ақыретте ашылған көзімізге.

Мәліметтер www.asylarna.kz сайтынан алынған.